Heb 1 | NdeIBE | STEP | Kudala uNkulunkulu wakhuluma kubokhokho ngabaphrofethi ezikhathini ezinengi langezindlela ezehlukeneyo,

Hebrews 1

INdodana ingaphezu kwezingilosi

1 Kudala uNkulunkulu wakhuluma kubokhokho ngabaphrofethi ezikhathini ezinengi langezindlela ezehlukeneyo,

2 kodwa ngalezizinsuku zokucina ukhulume kithi ngeNdodana yakhe, ayibeka ukuba yindlalifa yezinto zonke, yona adala ngayo izulu lomhlaba. 3 INdodana iyikubenyezela kwenkazimulo kaNkulunkulu kanye lesifanekiso uqobo sokuba nguye kwakhe, iqinisa izinto zonke ngelizwi layo elilamandla. Emva kokuba isidlinzekele ukuhlanjululwa kwezono, yahlala phansi ngakwesokudla sobuKhosi ezulwini.

4 Ngakho yaba ngaphezu kwezingilosi ngoba ibizo eyalithola njengelifa lilikhulu kulelazo.

5 Ngoba kukuyiphi ingilosi uNkulunkulu ake wathi kuyo, “Wena uyiNdodana yami; lamhla sengibe nguYihlo”? Kumbe njalo wathi, “Ngizakuba nguYise, yona izakuba yiNdodana yami”?

6 Njalo, lapho uNkulunkulu eletha izibulo lakhe emhlabeni, uthi, “Zonke izingilosi zikaNkulunkulu kazimkhonze.”

7 Lapho ekhuluma ngezingilosi uthi, “Wenza izingilosi zakhe zibe yimimoya, izinceku zakhe zibe ngamalangabi omlilo.”

8 Kodwa ngeNdodana uthi, “Isihlalo sakho sobukhosi, O Nkulunkulu, sizakuba khona kuze kube nininini, lokulunga kuzakuba yintonga yombuso wakho.

9 Ukuthandile ukulunga, wazonda ububi; ngakho uNkulunkulu, uNkulunkulu wakho, ukubeke ngaphezu kwabakhula bakho ngokukgcoba ngamafutha entokozo.”

10 Njalo uthi, “Ekuqaleni, O Nkosi, wabeka isisekelo somhlaba, lamazulu angumsebenzi wezandla zakho.

11 Kuzabhubha, kodwa wena uyasala ukhona; konke kuzaguga njengesigqoko.

12 Uzakugoqa njengesambatho; kuzantshintshwa njengesigqoko. Kodwa wena uhlala unjalo, leminyaka yakho kayiyikuphela.”

13 Kukuyiphi yezingilosi uNkulunkulu ake watsho kuyo ukuthi, “Hlala esandleni sami sokudla; izitha zakho ngize ngizenze isinabelo sakho?”

14 Izingilosi kazisimimoya esebenzayo yini ethunywe ukukhonza labo abazakudla ilifa lokusindiswa na?